| گئے تھے کام کرنے اب سمندر پار رہتے ہیں |
| وہاں بےکار تھے جو اب یہاں بیکار رہتے ہیں |
| خدا جانے اثر ماحول کا ہے یا ہوا کا ہے |
| جو دشمن تھے یہاں آپس میں کر کے پیار رہتے ہیں |
| پھٹکنے بھی نہ دیتے تھے مجھے نزدیک جو اپنے |
| انہی گلیوں میں آ کر وہ مری سرکار رہتے ہیں |
| جنہیں بھاتے تھے ساون بدلیاں برسات کے موسم |
| یہاں آ کر اسی موسم سے وہ بیزار رہتے ہیں |
| جو ڈگری کے مطابق کام کرنے پر نہ تھے راضی |
| وہ شوفر بن کے سڑ کوں پر سرِ بازار رہتے ہیں |
| جوانی کاٹ دی ساری ہے دولت جمع گر کرتے |
| ادھیڑ عمری میں لاحق ان کو اب آزار رہتے ہیں |
| حکومت کی مدد پر ہی گزارا کرنے والے بھی |
| بہت سے ڈگریوں والے پسِ پندار رہتے ہیں |
| خبر ہوتی نہیں اکثر ہیں کیسے ان کے ہمسا ئے |
| کہ ہیں وہ کون جو ان کے پسِ دیوار رہتے ہیں |
| شکایت ہے بلا لیتے ہیں جو ماں باپ کو اپنے |
| کہ بوڑھے والدین ان کے یہاں لا چار رہتے ہیں |
| کہیں شکوہ یہ ہوتا ہے بہت خود سر ہوئے بچّے |
| کہ بچپن سے یہاں بچّے تو خود مختار رہتے ہیں |
| غنیمت ہے کسی کو کوئی کافر بھی نہیں کہتا |
| یہاں چاروں طرف گرچہ سبھی کفّار رہتے ہیں |
| انہیں طارق تسلّی ہے جو ہجرت کر کے آئے ہیں |
| کہ سب انصار خدمت کو یہاں تیّار رہتے ہیں |
معلومات