| طاغوت ، حکمران کی طاقت ہے آجکل |
| دھوکہ دہی فریب سے عزّت ہے آجکل |
| پیمانہ کامیابی کا مکر و فریب ہے |
| دجّال کی اسی لئے شہرت ہے آجکل |
| کس طور سے ملی ہے نہ پوچھے گا یہ کوئی |
| سب سے ضروری ہو گئی دولت ہے آجکل |
| دو وقت کی روٹی بھی کمانا ہوا مشکل |
| بے فائدہ غریب کی محنت ہے آجکل |
| عیّاری و مکاّری ، ریا کاری ہے دیکھو |
| روزہ نماز حج بھی تجارت ہے آجکل |
| گنتی کے چند لوگ ہیں دیتے ہیں جو زکوٰة |
| اک کاروبار ، ساری عبادت ہے آجکل |
| بھائی کو مرتے دیکھ کے پروا نہیں ذرا |
| پر مانگتا خدا سے وہ نصرت ہے آجکل |
| کیا وقت اور آئے گا اترے گا جب مسیح |
| دیدار اس کا ہو ، بڑی حسرت ہے آجکل |
| حاذق طبیب ہو گا زمانے کا بھی کوئی |
| بیماریوں کی ہو گئی کثرت ہے آجکل |
| طارقؔ خدا سے نور تو سب کو عطا ہوا |
| محروم ، آنکھ ہی سے بصارت ہے آجکل |
معلومات