میں اکثر سوچتا ہوں زندگی کی شکل کیا ہوتی ؟ |
تباہی وصل نے کی زندگی بے وصل کیا ہوتی ؟ |
چمن میں ہر طرف ہی خار تھے واں پھول کیا کھلتے |
نہ بوتے نفرتیں تو زندگی کی فصل کیا ہوتی ؟ |
تمہیں اس جسم کے سرداب میں میں نے جگہ دی تھی |
تمہیں بے دخل کرتے زندگی دراصل کیا ہوتی ؟ |
شکستہ جزو مل کر کچھ شکستہ ہی بناتے ہیں |
تمہیں ملتے نہ پھر تو ہم ہماری نسل کیا ہوتی ؟ |
وہ کہتے ہیں کہ اپنی زندگی اک وہم ہے شاہدؔ |
اگر یہ نقل ہے میں سوچتا ہوں اصل کیا ہوتی ؟ |
معلومات