| غزل |
| قرار واقعہ دل کو قرار آ جائے |
| ترے قرار پہ گر اعتبار آ جائے |
| نفیس لب پہ شگفتہ نکھار آ جائے |
| بہار آنے سے پہلے بہار آ جائے |
| اسے سکون میسر نہیں سوا تیرے |
| قریب آؤ کہ دل کو قرار آ جائے |
| بھٹک رہا ہوں زمانوں سے در بہ در لیکن |
| گھما پھرا کے وہی کوئے یار آ جائے |
| عجیب سودا سمایا ہے سر میں الفت کا |
| ستم بڑھے تو ہمیں اور پیار آ جائے |
| متاع جاں کو لٹا کر اسے منا لوں گا |
| پلٹ کے وقت اگر ایک بار آ جائے |
| سمیٹنے میں گزر جائیں پھر کئی صدیاں |
| معاشرے میں اگر انتشار آ جائے |
| اُکھڑ رہی ہیں مرے قافلے کی سانسیں اب |
| خدا کرے کہ کوئی سایہ زار آ جائے |
| نظر نظر میں پلائیں وہ اس سلیقے سے |
| شہاب پینے سے پہلے خمار آ جائے |
| شہاب احمد |
| ۱ اپریل ۲۰۲۲ |
معلومات