| 8۔7۔2024 |
| غزل |
| مجھےکچھ دیر شاید آزمانا چاہتا ہو گا |
| منانے پر مرے وہ مان جانا چاہتا ہو گا |
| خبر ہے یہ مجھے کس بات پر وہ روٹھ جاتا ہے |
| تو کیوں ناراض ہونے کا بہانہ چاہتا ہو گا |
| کہیں اس کو شکایت میری سستی کی ملی ہو گی |
| اُسے شکوہ ہے مجھ سے ، یہ بتانا چاہتا ہو گا |
| میں سہہ جاتا ہوں چپکے سے ، سُنوں کڑوی کسیلی جو |
| مگر وہ شور اس پر کچھ مچانا چاہتا ہو گا |
| بھروسہ اُس پہ کرتے ، تم نہ جانے کیوں سمجھ بیٹھے |
| وہ راہ و رسم اوروں سے بڑھانا چاہتا ہو گا |
| بڑھے جو ہاتھ بھی اس کی مدد کو جانتا ہے وہ |
| وہ تیرا ساتھ بھی شانہ بہ شانہ چاہتا ہو گا |
| نہیں آتا ، اسیری سے پرندہ خوف کھاتا ہے |
| تو پھر وہ جال میں آنے کو دانہ چاہتا ہو گا |
| بتا دیتا جو پہلے ہی مجھے وہ میری بخشش کا |
| سمجھتا میں سبھی کو بس ڈرانا چاہتا ہو گا |
| یونہی تعریف کے پُل باندھتا ہے کون دنیا میں |
| کوئی نیکی تو مجھ سے بھی زمانہ چاہتا ہو گا |
| کسی کو دوستی میں آزماتے یوں نہیں طارق |
| تمہیں دستور پہلے یہ پڑھانا چاہتا ہو گا |
معلومات