| شعلۂ طور نہیں جلوۂ منصور نہیں |
| آہ ! اس وادی ایمن میں کہیں نور نہیں |
| ہر طرف ذکرِ حسیں ، زہرہ جبیں ، ماہِ مبیں |
| بزمِ عشاق پہ تف ! تذکرۂ حور نہیں |
| کوئی بجلی سی تڑپتی ہے مرے سینے میں |
| گو میں موسی بھی نہیں اور مرا دل طور نہیں |
| وصلِ محبوب میں کیا لطف ہو جب اے غمِ جاں |
| فرقتِ یار میں دل درد سے معمور نہیں |
| دستِ محبوب سے لے آؤ مئے دید و وصال |
| تشنہ لب ہوں نشۂ حسن سے مخمور نہیں |
| حسن تو حسن ہے مغرور تو ہونا ہے اسے |
| عشق بھی عشق ہی کیا ہر لمحہ جو رنجور نہیں |
| ابنِ آدم پہ قیادت ہے ہر اک ناز ترا |
| کون ہے سحر سے تیرے جو یاں مسحور نہیں |
| ماہ و پروین کی چاہ آہ ! غریبوں کو کہاں |
| تجھ سوا کچھ بھی مری جاں مجھے منظور نہیں |
| خود ہی آجائیں گے اک روز پشیماں ہوکر |
| صبر کر اے دلِ بیتاب ! وہ دن دور نہیں |
| آہ ! اس درد کے مارے سے کوئی پوچھے ذرا |
| کیا ستم ہے کہ کسی پل بھی یہ مسرور نہیں |
| ہاۓ ! کیا رند ہیں محرومِ تماشا کہ جنہیں |
| فکرِ فردا تو ہے امروز کا منشور نہیں |
| یوں تو جو چاہیں کہیں مجھ کو مگر یاد رہے |
| عزتِ نفس کا سودا مجھے منظور نہیں |
| نکتہ چینو ! کیوں مٹاتے ہو مرا نام آخر |
| کون بے گانہ ہے مجھ سے ، کہاں مشہور نہیں |
| مخلصی میں تو ہوں نایاب و گراں یاب مگر |
| حیف صد حیف کہ میں بندۂ غیور نہیں |
| فتنہ ساماں ہوں کہ لے آؤں قیامت اک دن |
| میرے ہاتھوں میں سرافیل کا گو صور نہیں |
| بادہ و خم کی ہو محتاج مری نظم و غزل |
| محفلِ شاہیؔ کا ایسا کوئی دستور نہیں |
معلومات