| چلیں آندھیاں کسی پیڑ کو بڑی چاہتوں سے بچا لیا |
| دیا باغباں نے جو سائباں ہے تمازتوں سے بچا لیا |
| لگِیں بے وفائی کی تہمتیں اٹھیں انگلیاں جو مری طرف |
| مری ہجرتوں نے وطن میں مجھ کو ملامتوں سے بچا لیا |
| میں ہوں خوش نصیب کہ روشنی ملی ایسی علم و شعور کی |
| ملا علم وہ مجھے مد رسوں کی جہالتوں سے بچا لیا |
| کِیا رب سے مجھ کو یوں آشنا مجھے آگہی کا دیا سبق |
| مجھے بے لگام معاشرے کی کثافتوں سے بچا لیا |
| مجھے رہنما وہ ملا چلا مرے ساتھ ہاتھ وہ تھام کر |
| ہوا نو جواں تو اسی نے کتنی حماقتوں سے بچا لیا |
| نہیں آ سکا میں اگر یہاں کسی دلرُبا کے فریب میں |
| مرے سر پہ میرا خدا رہا بُری ساعتوں سے بچا لیا |
| مرے دست و پا لئے آزما نہ ہلا سکے مجھے ابتلا |
| مری تربیت تھی جو سخت اُس نے ہلاکتوں سے بچا لیا |
| مجھے حقِّ رائے دہی تو تھا اسے چھین کر کیا بے زباں |
| مجھے کیا گلہ مرے ربّ نے گندی سیاستوں سے بچا لیا |
| جو ملا ہے ورثہ وہ دین کا ہے تو شکر اس پہ خدا کا ہے |
| جو کِیا الگ تو خصومتوں کی وراثتوں سے بچا لیا |
| میں تھا ایک طارقِ بے نوا مجھے کی زباں ہے رواں عطا |
| میں ہزار شکر کروں ادا مجھے لُکنتوں سے بچا لیا |
معلومات