| گہرا اثر ہوا ہے بزرگوں کی بات کا |
| یا معجزہ ہے دل کی کسی واردات کا |
| میری سبھی محبّتیں اب اس کے نام ہیں |
| مالک ہے وہ جو ساری مری کائنات کا |
| کرنے کو پیش اس کو مرے پاس کچھ نہیں |
| رکھے گا کیوں حساب مرے واجبات کا |
| آئے وہی نظر مجھے ہر شے میں اب یہاں |
| ہر سمت آئنہ وہی تجلّیات کا |
| باقی وہی بچا نہیں جس کو کبھی فنا |
| جاری ہے ورنہ سلسلہ موت و حیات کا |
| دستک تو دے کے دیکھ کبھی کھولتا ہے وہ |
| اس نے کبھی نہ بند کیا در نجات کا |
| محدود کر لیا ہے جو اپنی ہی ذات کو |
| تو کیسے جان پائے گا بھید اس کی ذات کا |
| الفت میں اس کی دل مرا پگھلا تھا ایک بار |
| طارق یہ تذکرہ ہے اسی ایک رات کا |
معلومات