| سبق جو فطرتاً توحید کا سکھا یا ہے |
| تو کائنات کو بھی رہنما بنایا ہے |
| رہے نہ کوئی بھی امکان تیری دوئی کا |
| نہ تیرا آئینے میں عکس ہے نہ سایہ ہے |
| کہاں تھی وسعتِ دل کے سوا جگہ تیری |
| اسی لئے ترا جلوہ یہاں بسایا ہے |
| جو تیرا قرب میسّر ہے آدمی کو بتا |
| کہیں جہاں میں کسی اور نے بھی پایا ہے |
| کبھی نظر تری رحمت کی پڑ ہی جائے گی |
| یہ تیرا بندہ ترے آستاں پہ آیا ہے |
| نہیں ہے دولتِ دنیا سے کچھ غرض مجھ کو |
| کہ تیری یاد مری عمر بھر کی مایا ہے |
| وصال ہو ترا راضی تُو مجھ سے ہو جائے |
| مجھے گناہوں سے اس شوق نے بچایا ہے |
| ترے حضور میں طارق کی حاضری تو ہو |
| یہ تیرے سامنے سجدوں میں سر جھکایا ہے |
معلومات