| آنکھ میں آ گئی نمی ہو گی |
| اس قدر مل گئی خوشی ہو گی |
| نہ رہیں ہم تو کیا کمی ہوگی |
| رقص میں یوں ہی زندگی ہوگی |
| کب قرار آۓ گا مرے من کو |
| ختم کب دل کی بے کلی ہوگی |
| جو ہوا وہ لکھا تھا قسمت میں |
| شاید اس میں ہی بہتری ہوگی |
| جان لے پیاس جو مرے من کی |
| تشنگی کو بھی تشنگی ہوگی |
| آپ کا غم رہے سلامت تو |
| ہم کو کس بات کی کمی ہوگی |
| خواب ہی یہ رہے گا دنیا میں |
| ہر طرف امن و آشتی ہوگی |
| اتنی زہریلی ہے یہاں کی فضا |
| سانس لینا بھی خود کشی ہوگی |
| دل لگانا ہے دل لگانے کا |
| دل لگی کی یہ دل لگی ہو گی |
| سب شکایت بجا نہ ان کی سہی |
| کچھ تو دیوانگی رہی ہوگی |
| وصل ہو جاۓ بھی ترا حاصل |
| یہ خوشی بھی تو عارضی ہوگی |
| روز ہی سوچتا ہوں لا حاصل |
| آج کی رات آخری ہوگی |
| درد خود ہی بنے گا اپنی دوا |
| موت خود اپنی زندگی ہوگی |
| نظر اونچی ہو تو بغاوت ہے |
| لب کھلیں گے تو سر کشی ہوگی |
| دل کے ہر گوشۂ زمیں میں مرے |
| ایک حسرت مری دبی ہوگی |
معلومات