حمد باری تعالٰی

جوڑ کے ویکھ لے ست زمیناں تے اسمان

رلا لے بھانویں عرش، کرسی، لا مکان

سما نئیں سکدا اِنہاں وچ رب رحمان

ویکھ وسعت دل عاشق دی جتھے ہویا رب مہمان

سراغ نہ پا سکدے اُسداعقل شعور تے امکان

باجھ مرشد ملے نہ ربدی محبت ، رضا تے پہچان

ہر نقص کجی توں پاک اے اُسدی ذات سبحان

ہر حسن تے خوبی توں اے اعلیٰ اُسدی شان

صحت ، روزی ، اولاد تے جان سب اُسدااحسان

غورنال سن ایہہ فرمان"هَلْ جَزَآءُ الْاِحْسَانِ اِلَّا الْاِحْسَانُ"

فقیر دے وچ عکس ربانی لشکار دا ہر ہر آن

فقیر تفسیر آیت قرآن "كُلَّ یَوْمٍ هُوَ فِیْ شَاْنٍ"

رب مشتاق اُس حمد دا اے جیہڑی نہ کیتی کسے زبان

اوہ محبوب حمد لوکو سوہنا کملی والا ﷺ کریسی بیان

دل انسانی رب دی نشانی جویں ہو وے گُلدان

پُھل بھرے یا خالی رکھے اوہدے ہتھ نفع ، نقصان

دل تے دیہہ ہن اُسدے ہتھ وچ جیہڑا مالک کل زمان

جیویں پھیرے جس پل پھیرے اوہ پھیردا کل جہان

نفس دیاں چالاں دے وچ پھس کے کیتی کیتائ نہ کر زان

تو ذکر خدا دی سپر بنا کے دور دفع کر شیطان

ہر بدی ، برائ تے کوتاہی نفس اپنے دی غلطی جان

خیر تے نیکی رب دی طرفوں ایہہ رمز سنجان بچاایمان

ربدی معرفت لین دی خاطر پہلے کر اپنی پہچان

اَوَّل آخر ظاہر باطن ہر دم سوہنے رب نوں جان

ہر دم رب دی یاد وچ بندیا رہ حاظر تے مستان

ایہہ کم اےصرف حضوری دا چھڈ غفلت تے نسیان

اُسدی رحمت نال پئے وسدے جنگل ، بیلے ، شہر ، جہان

اُسدے فضل دی لوڈ سب نوں جِن ہوون یا انسان