| ماحول شگوفوں سے بھرا عید کا دن ہے |
| آ مجھ کو گلے سے تو لگا عید کا دن ہے |
| ہے وصل کا موسم جو چلا عید کا دن ہے |
| "دل دل سے ملاؤ تو ذرا عید کا دن ہے" |
| سینہ سے نکل جائے یہ کینہ کی نحوست |
| سارے گلے شکوؤں کو بھلا عید کا دن ہے |
| خلجان و خلش دل میں کبھی آنے نہ پائے |
| الفت کا یہاں دیپ جلا عید کا دن ہے |
| ہر چھوٹے بڑے سے رہے اکرام و عنایت |
| ہم برتیں اخوت ہی سدا عید کا دن ہے |
| ہیں موجب زحمت یہ تکلم کی ادائیں |
| انداز میں ہو پیار و وفا عید کا دن ہے |
| غنچوں کا تبسم ہو، چمن مہکے یہ ناصؔر |
| گلشن کی بدل جائے فضا عید کا دن ہے |
معلومات