| حسن کی شمع شبِ وصل جلائی اس نے |
| برق جلووں کی مرے دل پہ گرائی اس نے |
| مہندی ہاتھوں پہ محبت کی رچائی اس نے |
| رنگینئِ حسن گلالوں سے بڑھائی اس نے |
| حسن مستور کی دے کر رو نمائی اس نے |
| بھر دیا دید کا کاسہ ءِ گدائی اس نے |
| وصل کی صبح جو اس شوخ نے لی انگڑائی |
| اک جنوں خیز قیامت تھی اٹھائی اس نے |
| میرے ہونٹوں پہ جو اظہارِ محبت آیا |
| میرے ہونٹوں پہ رکھی انگلی حنائی اس نے |
| چشمِ دلبر سے نظر ٹہری جو شیریں لب پر |
| پھر نظر چہرے سے میرے نہ ہٹائی اس نے |
| ڈھیروں باتوں میں تھی اک بات مسیحائی کی |
| ہونٹ کانوں کو جو مس کر کے بتائی اس نے |
| میں نے جب بولا مری چائے میں چینی کم ہے |
| اپنی انگلی مری چائے میں گھمائی اس نے |
| میری تصویر جو اک روز کتابوں میں ملی |
| چوم کر ہونٹوں سے سینے سے لگائی اس نے |
| بزم میں سب ہی ہوئے مدح سرا اس کے سحاب |
| جب محبت سے غزل تیری سنائی اس نے |
معلومات