| اشک ریزاں ہیں نگاہیں سینہ ہے آتش فشاں |
| مضطرب ہے روح میری لڑکھڑاتی ہے زباں |
| دردِ دل کیسے لکھوں کیسے کروں تجھ سے بیاں |
| کیا یہ ممکن ہے کہ ہو مسطور بھی آہ و فغاں |
| جرأتِ گفتاری پر آمادہ کرتا ہے مگر |
| میں جو اک حساس دل سینے میں رکھتا ہوں نڈر |
| . |
| آہ ! اے چشمِ فلک دیکھا نہیں کل کیا ہوا |
| شامؔ و ترکؔی کے مسلماں کا ہوا کیا ماجرا |
| وقت سے پہلے ہوا ہنگامۂ محشر بپا |
| کیا قیامت ان پہ گذری ہے ذرا تو ہی بتا |
| سنگ دل ! اب تَو ذرا ان پر بھی تُو آنسو بہا |
| درد کو قطروں کی صورت میں بہا تو بھی ذرا |
| . |
| گرگئی وہ بازوۓ مومن کی جو تعمیر تھی |
| وہ سراپا خوف و دہشت کی بنی تصویر تھی |
| کیا سماں تھا ہر طرف بکھری ہوئی تدبیر تھی |
| آہ ! شیداؤں پہ تیرے خندہ زن تقدیر تھی |
| ایک لمحے میں زمیں پر کیا سے کیا کچھ ہو گیا |
| دیکھتے ہی دیکھتے پل بھر میں سب کچھ کھو گیا |
| . |
| ایک ننھی سی پری سہمی ہوئی روتی ہوئی |
| جو سرِ دیوار دب کر تن بدن زخمی ہوئی |
| آنکھ میں آنسو نہیں گو دل سے وہ روتی ہوئی |
| جو تنِ نازک پہ اپنے کوہِ غم کو سہتی ہوئی |
| کررہی تھی اپنے رب سے وہ گلہ ، شکوہ مگر |
| ننھی سی اس جان کی لیکن کسے کیا تھی خبر |
| . |
| آہ ! یہ نظارۂ دل سوز محشر کی گھڑی |
| کیسی کیسی شان و شوکت خاک میں یوں مل گئی |
| آبروئے دینِ احمدؔ آج خاکستر ہوئی |
| غیر قوموں کے لیے یہ باعثِ فرحت ہوئی |
| تھا کبھی آباد انہیں سے یہ جہان رنگ و بو |
| آج لیکن ہرطرف ہے شور و غوغا ہاۓ و ہو |
| . |
| ملتِ مرحوم کی اب کیا سناؤں داستاں |
| خاک آلودہ نشیمن خاک و خوں ہیں آشیاں |
| باغ ویراں ہوگیا جب سے اٹھا ہے باغباں |
| غنچہ و گل ہو گیے سب آہ ! عبرت کے نشاں |
| کیا یتیموں سے کوئی یوں بھی خفا ہوتا ہے کیا |
| آنِ واحد میں کسی پر آسماں ڈھاتا ہے کیا |
| . |
| گرچہ یہ امت تری رحمت کے اب قابل نہیں |
| گرچہ اس امت سے تجھ کو کچھ بھی اب حاصل نہیں |
| گرچہ اس امت میں اب دیرینہ وہ محفل نہیں |
| گرچہ اس امت کے سینے میں تڑپتا دل نہیں |
| ہاں مگر تیرے ہی در پر یہ جھکاتی ہے جبیں |
| نام لیتی ہے ترا ہی تجھ سے یہ کٹتی نہیں |
| . |
| نام لیوا کیوں ترے ہیں آج آزردہ حزیں |
| کیا کوئی اپنوں سے ہوتا ہے خفا یوں بھی کہیں |
| ماسوا تیرے نہیں ہے جس کا کوئی ہم نشیں |
| جانتا ہے تو بھی لیکن پھر ترحم کیوں نہیں |
| شکوہ سنجی کی روش اپنایے نہ پھر کیوں صبا |
| کیوں گلہ اس کو نہ ہو تجھ سے ذرا تو ہی بتا |
| . |
| کیا محمدؔ ہی کی امت ہے کہ اس قابل خدا |
| برق و بجلی آشیانوں پر گرے ان کے سدا |
| ننھی ننھی جان کی آتی نہیں تجھ تک صدا |
| سچ یہ ہے کہ اب مسلماں کا نہیں کوئی خدا |
| امتِ مرحوم کی تجھ کو نہیں پروا ذرا |
| یوں تو دعوے تھے ترے محبوب سے سب سے جدا |
| . |
| قومِ باطل کو جہاں میں آبرو حاصل ہوئی |
| وہ زمیں پہ رہ کے بھی افلاک کے قابل ہوئی |
| وہ جہانِ رنگ و بو میں زینتِ محفل ہوئی |
| قیس کی لیلی بھی آخر جلوۂ محمل ہوئی |
| ایک میری قوم ہی ہر موڑ پر رسوا ہوئی |
| رزم ہو یا بزم و محفل ہر جگہ پسپا ہوئی |
| . |
| قتل و غارت تھی مقدر اور اب یہ زلزلہ |
| کب تلک چلتا رہے گا اے خدا یہ سلسلہ |
| کیوں نہ ہو اس قوم کو تیری خدائی سے گلہ |
| کیا کوئی اپنوں کو دیتا ہے بھلا ایسا صلہ |
| کل تلک یہ قوم ہی تھی تیری منظورِ نظر |
| آج کیوں یہ پھر رہی ہے دربدر شوریدہ سر |
| . |
| عادل و منصف کا شاید ہاں، یہی دستور ہے |
| کل تلک شہ زور تھی جو آج وہ مجبور ہے |
| ہے سراپا درد و حسرت ہر نفَس رنجور ہے |
| ایک میری قوم ہی مغضوب ہے مقہور ہے |
| جب تلک یہ قوم تیرے کام کے لائق رہی |
| تھی تری رحمت کے قابل اب مگر یہ مٹ گئی |
| . |
| ہے زباں پر شکوۂ بیداد آخر کیا کروں |
| لٹ گئی ہے تیری امت ہے سراپا خاک و خوں |
| ہر طرف بکھری ہوئی ہے ہر طرف خوار و زبوں |
| دل میں میرے غم ہی غم ہیں ایک غم ہو تو کہوں |
| آہ ! اے پیارے نبی جی ! آپ کو روتا ہوں میں |
| قطرہ قطرہ آنکھ میں آنسو لیے سوتا ہوں میں |
| . |
| کب زمیں کو جرأتِ پیکار ہوتی تھی یہاں |
| برق و بجلی کانپتی تھی کانپتا تھا آسماں |
| جب تلک تو تھا جہاں میں تھا خدا بھی مہرباں |
| رحمتوں کو لے کے آتا خود زمیں پر آسماں |
| آہ اے محبوب ! اب روتا ہوں تیری دید کو |
| ان گریباں چاک کی خاطر سرورِ عید کو |
| ایک عزیز کی فرمائش پر فی الحال اسے شیئر کررہا ہوں تاہم کام ابھی باقی ہے ۔۔۔۔۔۔ سلسلہ جاری ہے ۔۔۔۔۔۔۔ |
| (شاہؔی تخیلات) |
| شاہؔی ابو اُمامـه شــؔاہ ارریاوی |
معلومات