| نہ کیوں ہو تیری شاں غوث الوریٰ, یا غوث یا میراںؓ |
| ہو ابنِ سیدِ خیرالوریٰؐ, یا غوث یا میراںؓ |
| غُلامی میں ہیں تیری اولیا, یا غوث یا میراںؓ |
| سَلامی دے رَہے ہیں اصفیا, یا غوث یا میراںؓ |
| دِیا تُو نے سبق عرفان کا, یا غوث یا میراںؓ |
| تِرے ہے گِرد سِرّ کا دائرہ, یا غوث یا میراںؓ |
| تِرے اجداد نے تم کو عطا فرمائے ہیں سب علم |
| نگہبانِ علومِ انبیاؑ, یا غوث یا میراںؓ |
| بِلا شک و شبہ تم دست گیرِ طالبانِ حق |
| بِلا شک و شبہ تم پیشوا, یا غوث یا میراںؓ |
| علی ابنِ ابی طالبؑ کے بیٹے ہو نہ یوں ٹالو |
| تِرے شایاں نہیں دھتکارنا, یا غوث یا میراںؓ |
| وہ ہے مطرودِ درگاہِ خداوندِ ہر اِک عالم |
| جو تجھ سے اور تِرے در سے پِھرا, یا غوث یا میراںؓ |
| ورق گردانی میں ہی بس رَہا ہر لمحہ سرگرداں |
| تِرا منکر نہ آسودہ ہُوا, یا غوث یا میراںؓ |
| زمانہ جو کَہے کہتا رَہے مَیں اِتنا ہی جانوں |
| مِرا دل میری جاں میرے پیا, یا غوث یا میراںؓ |
| رَہے یونہی ہر اِک لمحہ مِرے سر پر تِرا سایہ |
| رَہے لطف و کرم مجھ پر سَدا, یا غوث یا میراںؓ |
| جو غیرت والا عزت پر تِری دیتا رَہا پہرا |
| مَیں شاہدؔ ہُوں غُلام اُس شاہ کا, یا غوث یا میراںؓ |
معلومات