| زندگی یا موت ابھی تک فیصلہ کچھ بھی نہیں |
| مجھ سے بیمارِ محبت کی دوا کچھ بھی نہیں |
| ان سے بچھڑے ہیں مگر زندہ ہیں پہلے کی طرح |
| وہ سمجھتے ہیں ہمیں اب تک ہُوا کچھ بھی نہیں |
| عشق صادق ہے ہمارا، ہم کہاں گھبرائیں گے |
| آپ کا غصہ، غضب، جور و جفا، کچھ بھی نہیں |
| یوں ہی، بے جا، بے سبب، تم ہم سے ہوتے ہو خفا |
| بوسہ ہی تو مانگتے ہیں اور خطا کچھ بھی نہیں |
| لڑکھڑائے ہیں نمازِ فجر میں کچھ نیند سے |
| شیخ جی نے رات میں ورنہ پیا کچھ بھی نہیں |
| ان سے اظہارِ محبت تو کیا لیکن جناب |
| سر ہلا کر چل دیے ہاں میں، کہا کچھ بھی نہیں |
| وصل کی رات ایک دیدار اور دو باتیں ہوئیں |
| یوں سمجھ لیجے بنا لیکن بنا کچھ بھی نہیں |
| خونِ ناحق کا ہمارے ہے کفِ قاتل پہ داغ |
| کہتا ہے جو ما سوا رنگِ حنا کچھ بھی نہیں |
| ریت، گیلی ریت، پانی اور پھر بحرِ بلا |
| ابتدائے عشق تو ہے، انتہا کچھ بھی نہیں |
| دیکھیے بنتا ہے کیا محشر میں تنہاؔ آنحضور |
| پارسا ہیں یا گنہگار اب پتا کچھ بھی نہیں |
معلومات