| سرکارِ دو عالم کے فیاض گھرانے ہیں |
| وہ دہر کے داتا ہیں سب ان کے خزانے ہیں |
| اے بادِ صبا لے جا دربار جہاں ان کا |
| کچھ باتیں جو کرنی ہیں کچھ شکوے سنانے ہیں |
| سر قدموں پہ گر آئے معراج ہے یہ میری |
| کچھ زخم دکھانے ہیں کچھ آنسو بہانے ہیں |
| اغیار میں ہوں تنہا جانا ہے مجھے بطحا |
| ہیں گجرے درودوں کے اور نغمے سنانے ہیں |
| آشا ہے مدینے کی ہستی کے نگینے کی |
| سب جھولیاں بھرنی ہیں طالع جو جگانے ہیں |
| ہیں بھار لئے سر پر داتا کے چلو در پر |
| یہ سینے سجانے ہیں شفاف بنانے ہیں |
| سب دور اندھیرا ہو پُر نور سویرا ہو |
| دل صاف کرانے ہیں طاغوت گرانے ہیں |
| دربار سجا ان کا گھر بار ضیا ان کا |
| کیا خوب زمانے ہیں جو دہر نے جانے ہیں |
| دلدارِ جہاں ہیں وہ مختار مدینے کے |
| موسم ہے حسیں جس جا باغات سہانے ہیں |
| داتا ہیں حسیں سرور آ ان کے سخی در پر |
| گر داغ ہٹانے ہیں دکھ درد مٹانے ہیں |
| دل جاں سے ندا کر تو محمود دعا کر تو |
| مے خانہ ہو ساقی کا غم فکر بھلانے ہیں |
معلومات