راہِ حق کا مسافر

جو حق کی رَہ پر چلتے ہیں کانٹوں کو بچھایا جاتا ہے

ہر ایک قدم پر ان کو تو پھر خوب ستایا جاتا ہے

ظاہر کی سجاوٹ مت دیکھو باطن میں عداوت کتنی ہے

اک جام محبّت کا دے کر یوں زہر پلایا جاتا ہے

کرتے ہیں نیکی جس سے ہم چلتا ہے چالیں وہ ہر دم

دل پر میرے اک کوہِ سِتم چُپکے سے گرایا جاتا ہے

کُچھ کم تھے کیا دُکھ اپنوں کے جو ساتھ ملے وہ غیروں کے

اک پاش جگر کے ٹکڑوں پر یوں جشن منایا جاتا ہے

یہ کھیل تباہی کا یارو وہ کھیل رہے ہیں مستی میں

فرعون بنے ہیں کچھ ایسے انجام بھُلایا جاتا ہے

مظلوم ہے بے بس دنیا میں تم بھول رہے ہو عُقبیٰ کو

ظالم کو قیامت کے دن تو دوزخ میں جلایا جاتا ہے

پھر کون گِرائے زیرکؔ کو عطار ہیں حامی اس کے تو

مجلس میں ان کی مُجھ جیسے، گِرتوں کو اُٹھایا جاتا ہے