| وقتِ سحر جمال کی صورت نہ پوچھئے |
| شامِ فراقِ یار کی وحشت نہ پوچھئے |
| پھیلا ہے کائنات میں ہر سمت اس کا رنگ |
| نیرنگیٔ خیال کی حیرت نہ پوچھئے |
| سینے میں جل رہی ہے یہ جو آگ عشق کی |
| حسن و جمالِ یار کی حدّت نہ پوچھئے |
| ہر شے کو اس طرح سے مکمّّل کیا گیا |
| صنعت کے اس کمال کی جدّت نہ پوچھئے |
| مانا ہے لطف ہجر کے ایّام کا الگ |
| دلبر کے پھر وصال کی لذّت نہ پوچھئے |
| آنکھوں کے سامنے وہی صورت رہے سدا |
| کتنی ہے اس کی یاد کی شدّت نہ پوچھئے |
| جی کر تو دیکھئے کبھی اس کے لئے ذرا |
| آئے گی زندگی میں وہ راحت نہ پوچھئے |
| طارق ذرا سا ہاتھ ہلانے کی دیر ہے |
| اتنی ملے گی کام کی اجرت نہ پوچھئے |
معلومات