| دیکھ آ کر ماں کہ تیری قبر پر آیا ہے کون |
| قلب و جاں کے ساتھ آنسو درد کے لایا ہے کَون |
| چھوڑ کر تُم کیوں بھلا اک ننّھے سے معصوم کو |
| کر گئیں ہر پیار سے نا آشنا محروم کو |
| مجھ سے پہلے بھی مرے بھائی بہن پیدا ہوئے |
| وہ بھی تو ایسے ہی تیرے پیار کے شیدا ہوئے |
| ایک مشفق باپ کا تا دیر گو سایہ رہا |
| بھائی بہنوں کا تعلّق بھی گرانمایہ رہا |
| پھر بھی ماں اس وقت مجھ کو یاد تُو آتی رہی |
| جب بھی کوئی ماں کسی کے سر کو سہلاتی رہی |
| آج تک مجھ کو کوئی بھی میری جاں نا کہہ سکا |
| جس طرح مَیں بھی کسی کو میری ماں نا کہہ سکا |
| گرچہ مَیں خود بھی ہوں اب پیرانہ سالی کا شکار |
| پھر بھی مجھ کو یاد آتی ہے تُو دن میں بار بار |
| اور بھی کتنے ہی رشتے ہیں وفا کے پیار کے |
| پر اکیلی ماں ہی ہے جو جیتتی ہے ہار کے |
| اچھّا مجھ سے وعدہ کر جنّت میں جب جائے گی ماں |
| مجھ کو بھی اپنے خدا سے کہہ کے بلوائے گی ماں |
| “ آسماں تیری لحد پر شبنم افشانی کرے |
| سبزۂ نَو رستہ اس گھر کی نگہبانی کرے “ |
معلومات