.jpg)
| مُجھ پر بھی کھول دے تُو عالم مِثال کا |
| یہ بھی تو ایک رُخ ہے تیرے جَمال کا |
| تیرا ہی نُور ظاہر، ہر شَے سے ہے مَگر |
| مَظہر ہے نُورِ احمدؐ تیرے جَلال کا |
| بابِ اِرم پہ گُونجا نعرہ اَحَد اَحَد |
| اوّل وہاں قَدم ہے تیرے بِلالؓ کا |
| حُکمِ فَاَیْنَمَا ہے آیا اِسی لیے |
| چہرہ ہے ایک جیسا تیرے رِجال کا |
| ہر شکلِ اِنْس و جاں میں تیرا ہی عکس ہے |
| میں بھی ہوں اِک نَمونہ تیرے کَمال کا |
| کب سے پھنسا ہُوا ہوں قیدِ حجاب میں |
| کوئی تو ہو وَسیلہ تیرے وِصال کا |
| اوقات کیا ہے میری، میں کیا حساب دوں |
| لَہجہ نہ سَہہ سکوں گا تیرے سوال کا |
| منزل نہیں ہے کوئی راہِ نیاز میں |
| حیرت میں ہے ٹِھکانہ تیرے نِہال کا |
| تیری رَضا کا طالب مانگے تو بس یہی |
| تانْتا نہ ٹُوٹے کوئی تیرے خیال کا |
معلومات