| اُجڑی ہوئی بستی میں آتے نہ تو اچھا تھا |
| سرشاری و مستی میں آتے نہ تو اچھا تھا |
| ہنگامۂ ہستی میں آتے نہ تو اچھا تھا |
| محشر طلباں آئے |
| افسوس! کہاں آئے |
| افسوس! یہاں آئے |
| اک کھیل عجب دیکھا، اک قہر، غضب دیکھا |
| اک زخم درونِ دل، آرام طلب دیکھا |
| کیا دیکھنا دیکھا اور دیکھا بھی تو کب دیکھا |
| کُھلنے پہ زباں آئے |
| افسوس! کہاں آئے |
| افسوس! یہاں آئے |
| کانٹوں میں پھنسا دامن، دامن کو چھڑانے میں |
| کچھ دیر تو لگتی ہے، کچھ دیر لگانے میں |
| ہے لطف خدا جانے، کیا جان کھپانے میں |
| کیا کیا نہ گماں آئے |
| افسوس! کہاں آئے |
| افسوس! یہاں آئے |
| کس طور گزارا ہو، کس طور کنارا ہو |
| ہم ہم نہ ہوں دل دل کے، دل دل نہ ہمارا ہو |
| اُس راہ چلے جائیں، جس راہ اشارہ ہو |
| فریاد و فغاں، آئے |
| افسوس! کہاں آئے |
| افسوس! یہاں آئے |
| مے کش تھے، خمار اندر، ہاتھوں سے سبو چھوٹا |
| آئینہ سا دل ٹوٹا، آنکھوں سے لہو پھوٹا |
| چہرے کو بہت نوچا، سینے کو بہت کوٹا |
| کر کر کے زیاں آئے |
| افسوس! کہاں آئے |
| افسوس! یہاں آئے |
| شاعر ہوئے کیا شاعر، دیوان ہمارا کیا |
| کیا فکر ہماری، کیا، وجدان ہمارا کیا |
| جب آپ ہوئے تنہاؔ، نقصان ہمارا کیا |
| بے نام و نشاں آئے |
| افسوس! کہاں آئے |
| افسوس! یہاں آئے |
معلومات