| خوابِ غفلت سے جگا دے ساقی |
| دل کو جینے کی ادا دے ساقی |
| دل پہ برسوں سے اندھیرا چھایا |
| کوئی روزن تو بنا دے ساقی |
| سچ جو ہونٹوں پہ ٹھہر جاتا ہے |
| اس کو آواز بنا دے ساقی |
| عمر بھر خوف کو پوجا ہم نے |
| خوف کا بت ہی گرا دے ساقی |
| جس کو منزل سمجھ کے بیٹھے ہیں |
| اس سے آگے کا پتا دے ساقی |
| عمر بھر ضبط کی عادت پالی |
| آج جی بھر کے رلا دے ساقی |
| جن کی زنجیر کو زیور سمجھا |
| ان سے آزاد کرا دے ساقی |
| خود جسے کہتے ہیں شاہدؔ شاہدؔ |
| اس کو بھی سچ سے ملا دے ساقی |
معلومات