| درد کے قصے سُناتی ہے ہوا |
| اُس کو چُھو کر جب بھی آتی ہے ہوا |
| رقص کرتے ہیں اندھیرے چار سُو |
| جب دیا کوئی بُجھاتی ہے ہوا |
| مَیں نے دیکھا ہے یہ منظر دوستو |
| پانیوں پر جھلملاتی ہے ہوا |
| چھیڑ دیتی ہے یہ دل کے تار سب |
| پیار کے نغمے سُناتی ہے ہوا |
| بات وہ کاغذ پہ کرتا ہوں رقم |
| کان میں جو کہہ کے جاتی ہے ہوا |
| پاس آ کر خوب روتی ہے مگر |
| دُور جا کر مُسکراتی ہے ہوا |
| گیت گاتی ہے وفا کے ہر طرف |
| بستی بستی ہو کے آتی ہے ہوا |
| حالِ دل مانی سُناتی ہے اُسے |
| رازداں جِس کو بناتی ہے ہوا |
معلومات