| قدرتِ اوّل کے بعد آئی خلافت کی بہار |
| تھی خبر یہ بھی کہ اب آتی رہے گی بار بار |
| دوسری قدرت مسیحا کی خلافت کا ظہور |
| فیض پائیں گے خلیفہ پر ہوا جن کا مدار |
| لوگ سو باتیں کریں ہم کو خلافت ہے عزیز |
| ہم ہوئے اس پر فدا ہے جان و دل اس پر نثار |
| دودھ میں مائیں پلاتی ہیں محبّت کی شراب |
| ماؤں سے بڑھ کر خلافت سے ہوا بچوں کو پیار |
| ہر طرف ناکامیوں نے ڈھیر ان کو کر دیا |
| دشمنوں نے گرچہ تدبیریں تو کی ہیں صد ہزار |
| فتح و نصرت ہے مقدّر میں خلافت کے ہمیش |
| اور مخالف کے لئے ذلّت لکھی ہے بے شمار |
| ہے پریشانی عیاں اب ان کے چہرے سے ہوئی |
| دُور جا کر کَل نظر آتی ہے اب تاریک و تار |
| دشتِ ویراں اک طرف جس پر برستی نار ہے |
| اک طرف گلشن ہے رونق ہے جہاں لیل و نہار |
| جو ہیں وابستہ خلافت سے بشارت ہو انہیں |
| گِرد ان کے ہے حفاظت کو فرشتوں کا حصار |
| جان جائیں گر خلافت کی اطاعت کے فیوض |
| اس کے ہاتھوں پر کریں بیعت سبھی دیوانہ وار |
| ہم ہیں خوش قسمت جو طارق اس کے در پر آ پڑے |
| اس کی خاطر دل دھڑکتے ہیں جو ہو کر بے قرار |
معلومات