| خدا سے مانگی ہیں رو رو کے عظمتیں تیری |
| مرے وطن مجھے مطلوب رفعتیں تیری |
| ہے میرے درد کا درماں تری ہی یادوں میں |
| بسی ہوئی ہیں مرے دل میں چاہتیں تیری |
| میں کیوں نہ تجھ کو دل و جان سے عزیز کہوں |
| مرے تو شاملِ ایماں ہیں الفتیں تیری |
| وہ مست صبحیں معطر وہ شام شام تری |
| مشامِ جاں میں بسی ہیں وہ نکہتیں تیری |
| خدا نے تجھ کو نوازا ہے یوں تو ہر شئے سے |
| نہ راس آ سکیں تجھ کو قیادتیں تیری |
| کڑا ہے وقت مرے ہم وطن ذرا ہشیار |
| نہ رائیگاں ہوں کہیں سب ریاضتیں تیری |
| خدا کی حفظ و اماں میں ہے یہ چمن اے عدو |
| عبث ہیں سارے فریب و شرارتیں تیری |
| دعا ہے ناز کی اے میرے سر بکف غازی |
| بلائیں لیں یونہی پیہم شجاعتیں تیری |
معلومات