| کسی کے کام جو آ جائے، زندگی وہ ہے |
| دلوں میں گھر جو بنا جائے، زندگی وہ ہے |
| جو اپنے درد کو چپ چاپ مسکرا کے سہے |
| جو دوسروں کو ہنسا جائے، زندگی وہ ہے |
| چراغ خود ہی اندھیروں سے لڑ نہیں سکتے |
| ہوا بھی ساتھ نبھا جائے، زندگی وہ ہے |
| نہ تخت کی ہو تمنّا ، نہ تاج کی خواہش |
| جھکے سروں کو اٹھا جائے، زندگی وہ ہے |
| ہر اک کی پیاس کا پانی سے واسطہ ٹھہرا |
| کسی کی پیاس بجھا جائے، زندگی وہ ہے |
| تمام عمر رہے گل رؤوں کی ہم راہی |
| جو خوشبوؤں میں نہا جائے، زندگی وہ ہے |
| حسابِ نفع و زیاں سے بلند تر ہو دل |
| جو صد خوشی سے لُٹا جائے، زندگی وہ ہے |
| دعائیں بن کے اثر لفظ وہ کرے طارِقؔ |
| کہ ٹوٹے دل کو بچا جائے، زندگی وہ ہے |
معلومات