| نامِ نبی سے جس نے من کو سجا لیا ہے |
| یادِ حسیں سے دل میں دیپک جلا لیا ہے |
| پھر روپ اس دہر کے لگتے ہیں سارے مدھم |
| ذکرِ نبی کو ہی گر سمرن بنا لیا ہے |
| شہرِ نبی سے نکہت تسکیں بنے گی دل کی |
| عفریتِ نفس کو گر تو نے گرا لیا ہے |
| بے شک زیاں نے دل کو خطرات میں ہے ڈالا |
| ہر بار فیضِ جاں نے اس کو بچا لیا ہے |
| مختارِ کل حبیبی رہبر حسیں ہیں کامل |
| دیکھیں دنیٰ میں اُن کو کس نے بلا لیا ہے |
| قرباں ہے جان میری ذاتِ حبیبِ رب پر |
| طاغوت کے اثر کو جس نے دبا لیا ہے |
| عشقِ حبیبِ رب دے عاشق کو بے نیازی |
| جس سے جہان اپنا اس نے سجا لیا ہے |
| محمود فضلِ حق سے ہوتا ہے پار وہ ہی |
| عشقِ نبی کو جس نے سینے لگا لیا ہے |
معلومات