| جام ساقی تو کر شمار نہیں |
| بے خودی ہے مجھے خمار نہیں |
| درِ مے خانہ کھول دے ساقی |
| بے قراروں کو ہے قرار نہیں |
| زندگی ایسا ہے چمن جس میں |
| ہر گھڑی موسمِ بہار نہیں |
| زندگی کا کوئی بھروسہ نہیں |
| موت کا کوئی اعتبار نہیں |
| ایک ہی مرتبہ ہوا ہے عشق |
| موت آتی ہے بار بار نہیں |
| بڑھ گیا اور اشتیاق مرا |
| کچھ عیاں کچھ ہے حسنِ یار نہیں |
| تلخ گو ہیں ذرا سے وہ لیکن |
| دل میں رکھتے ہیں کچھ غبار نہیں |
| عشق سے ہے ترے ہمیں مطلب |
| کیا ہوا گر وفا شعار نہیں |
| کیا کروں گا میں اس طرح جی کر |
| جان تم پر ا گر نثار نہیں |
| ہوگئی پھر مری نماز قضا |
| وقت کرتا ہے انتظار نہیں |
| سبحہ گرداں ہے کس لۓ قادر |
| ذکر دانوں پہ کر شمار نہیں |
معلومات