| رکھتے تھے شوق کر کے جو دیدار مر گئے |
| جلوے سے ایک خود سرِ بازار مر گئے |
| ماحول اُس گلی کا نہ راس آ سکا انہیں |
| کوٹھی سے آئے کوٹھے پہ دو چار مر گئے |
| صد حیف کہہ نہ پائے تھے جو حالِ دل کبھی |
| کرنے سے پہلے پیار کا اظہار مر گئے |
| دیکھا نگاہِ ناز سے اس نے کچھ اس طرح |
| ڈھائی قیامت ایسی کہ دلدار مر گئے |
| وہ جن کو وصل کی کبھی منزل نہیں ملی |
| “جن جن کو تھا یہ عشق کا آزار مر گئے” |
| جیتے تھے نام لے کے جوانی میں ان کا جو |
| کہتے ہیں ہو گئے تھے وہ بیمار مر گئے |
| جو سامنے مرے ہیں شمار ان کا کم نہیں |
| وہ لوگ بھی ہیں جو پسِ دیوار مر گئے |
| آزادیٔ خیال کے قائل نہیں بچے |
| اب تک رہے جو بر سرِ پیکار مر گئے |
| آزادیٔ ضمیر کا سودا نہیں ہوا |
| کہتا ہے کون اس کے خریدار مر گئے |
| ہاتھوں جنوں کے اہلِ خرَد کھا گئے شکست |
| وہ عشق میں ہوئے جو گرفتار مر گئے |
| جس نے قلم سے وار کیا جیت وہ گیا |
| جو لے کے آئے ہاتھ میں تلوار مر گئے |
| طارق مرے چہیتے تھے جی دار تھے سبھی |
| وہ ایک ایک کر کے سبھی یار مر گئے |
معلومات