| غزل |
| اُن سے وعدہ وفا نہیں ہوتا |
| “ وَرنہ دُنیا میں کیا نہیں ہوتا ” |
| شکریہ - تہنیت ۔ عنایت کا |
| ہاتھ دل سے جدا نہیں ہوتا |
| آپ اپنے ہیں، سو شکایت ہے |
| غیر سے تو گلہ نہیں ہوتا |
| جی عجب وہم پال لیتا ہے |
| جب کوئی مشغلہ نہیں ہوتا |
| گرچہ گزریں قیامتیں ہر دِن |
| حشر پھر بھی بپا نہیں ہوتا |
| کشمکش گوں نہ گوں نہیں ہوتی |
| زندگی میں مزا نہیں ہوتا |
| عشق میں ٹوٹ پھوٹ ہو سو ہو |
| تجربہ یہ بُرا نہیں ہوتا |
| گرچہ اچھا سبھی نہ ہو تب بھی |
| سب یقیناً بُرا نہیں ہوتا |
| حُسن جتنا لطیف و ارفع ہو |
| عِشق سے ماورا نہیں ہوتا |
| ظلم کو تقویت پہنچتی ہے |
| حق پہ جب فیصلہ نہیں ہوتا |
| جھوٹ لکھوں ضمیر بوجھل ہو |
| سچ کہوں حوصلہ نہیں ہوتا |
| سوچ لو شہر دل سے جاؤ تو |
| واپسی راستہ نہیں ہوتا |
| رنجشیں ختم کسطرح ہوتیں |
| باہمی مشورہ نہیں ہوتا |
| یا تو نشتر دے یا کوئی نسخہ |
| درد بڑھ کر دوا نہیں ہوتا |
| جڑ تناور شجر کی کٹ جائے |
| وہ دوبارہ ہرا نہیں ہوتا |
| کاش تدبیر سوجھتی پہلے |
| آج یہ حادثہ نہیں ہوتا |
| باہمی چاہتیں سلامت ہیں |
| مدتوں رابطہ نہیں ہوتا |
| گرچہ پل پل نظر میں رہتے ہو |
| آمنا سامنا نہیں ہوتا |
| قدر آتی ہے دوستوں کی تب |
| جب کوئی ہم نوا نہیں ہوتا |
| دوستداری میں کچھ بھی کر گزرو |
| دِل ہمارا برُا نہیں ہوتا |
| شرح لکھ دیں ہزار صفحوں پر |
| شعر کا حق ادا نہیں ہوتا |
| شوخ بولا شہاب مر بھی جا |
| ہنستے ہنستے کہا ” نہیں ہوتا ” |
| شہاب احمد |
| ۱۵ جولائی ۲۰۲۳ |
معلومات