کسی کی زندگی دشوار سے دشوار تر کرنا |
سمجھنا پھر اِسے جنَّت میں اپنے نام گھر کرنا |
یہ ضد کرنا کسی کو حق نہیں ، دین اپنا بتلائے |
رضائے یار کی خواہش کے بدلے میں ، مگر کرنا |
عجب منطق ہے یہ جس کو سمجھنا قدرے مشکل ہے |
کہ ممکن ہی نہیں ، اُن پر دلائل کا اثر کرنا |
بتائے گا وہ کیا گزرا نہیں جو ان مراحل سے |
نہیں آساں کسی کو حالِ دل سے با خبر کرنا |
ضروری تو نہیں یہ دل کسی پر آ ہی جائے گا |
یہی سیکھا محبت ہو اگر تو ٹوٹ کر کرنا |
“ وفاداری بشرطِ اُستواری اصلِ ایماں ہے “ |
تو جس کو چاہنا اُس سے وفا بھی عمر بھر کرنا |
تُم ان کا حال دیکھو آزمائش روز ہے جن کی |
حفاظت کر کے ایماں کی ، بصد مشکل بسر کرنا |
کسی کے حکم کا ہے منتظر طارق علاج اب تو |
دُعا پر منحصر ہو گا ، دواؤں کا اثر کرنا |
معلومات