| جلسہ سالانہ جرمنی کے نام |
| محبّت کا عقیدت کا سفر تم کو مبارک ہو |
| مبارک جرمنی والو! تمہیں جلسہ مبارک ہو |
| جہاں دل مل کے کرتے ہیں دعاؤں سے پذیرائی |
| جہاں لب پر دعا رکھتے ، خلیفہ کے ہیں شیدائی |
| جہاں رونق ہو ، دل کی ساری سستی دور ہو جائے |
| جہاں سے نعرۂ تکبیر کی اونچی صدا آئے |
| ملاقاتیں جہاں بچھڑے ہوئے لوگوں سے ہوتی ہیں |
| خدا کے سامنے آنکھیں جہاں پر مل کے روتی ہیں |
| جہاں علم و ہنر کے نور سے دل جگمگاتے ہیں |
| جہاں رحمت کے بادل خیر کی بارش بھی لاتے ہیں |
| جہاں نورِ الٰہی سے فضا ہوتی منوّر ہے |
| جہاں الفت کی خوشبو سے ہر اک محفل معطّر ہے |
| یہاں مہمان سارے جانتے اِخلاص کے گُر ہیں |
| یہاں پر میزباں سارے خلوص و نور سے پُر ہیں |
| کہیں پانی کی خدمت ہے، کہیں مُسکاں کی سوغاتیں |
| کہیں اشکوں میں ڈھلتی ہیں محبّت کی کراماتیں |
| یہ جلسہ اتحادِ دل کا پیغامِ وفا لایا |
| یہیں ہر شخص نے اخلاص کا رشتہ نیا پایا |
| یہاں سنتے ہیں ہم امن و اخوّت کے جو افسانے |
| یہاں عشقِ محمدؐ سے بھریں دن رات پیمانے |
| یہاں قرآن کی تعلیم کا پرچار ہوتا ہے |
| یہاں سنت کا زندہ ہر عمل ہر بار ہوتا ہے |
| یہاں اک عہدِ بیعت کی تجلی بھی دکھائی دے |
| یہاں ہر آن دل کو تازگی ، اک رہنمائی دے |
| جہاں ہر اک دلِ مومن میں جلتا ہے چراغِ دیں |
| جہاں بڑھتی ہے الفت، مٹتی جاتی ہے کدورت ، کِیں |
| یہیں اِخلاص کے جھنڈے فضاؤں میں ہیں لہراتے |
| یہیں صبر و رضا کے باغ خوشبو سے ہیں مہکاتے |
| محبّت کا عقیدت کا سفر تم کو مبارک ہو |
| مبارک جرمنی والو! تمہیں جلسہ مبارک ہو |
معلومات