| منزلوں سے فاصلہ اچھا لگا |
| گھر سے گھر کا راستہ اچھا لگا |
| چپکے چپکے بولنا اچھا لگا |
| کان میں رس گھولنا اچھا لگا |
| ہلکی پھلکی دشمنی کے درمیاں |
| دوستی کا سلسلہ اچھا لگا |
| اس کی زہریلی ہنسی اچھی لگی |
| طنز سے یوں دیکھنا اچھا لگا |
| موسموں کی دھوپ چھاؤں میں ہمیں |
| مان جانا روٹھنا اچھا لگا |
| اس کا یوں بے التفاتی پن لئے |
| بے رخی سے دیکھنا اچھا لگا |
| روشنی کے خط پہ خط کھچتے رہے |
| شب کو تارے توڑنا اچھا لگا |
| جانے کیوں شب بھر مجھے اے آسماں |
| چاند تارے نوچنا اچھا لگا |
| زندگی کی تلخیوں کے جام میں |
| بچپنے کا گھولنا اچھا لگا |
| دل تو رویا تھا مگر پھر بھی مجھے |
| اس کا ظالم قہقہہ اچھا لگا |
| اس بتِ کا فر کو یوں پہروں ہمیں |
| دل ہی دل میں کوسنا اچھا لگا |
معلومات