| ترے ہجر کی شام تھی، اور میں |
| حسیں رُت ، سرِ بام تھی اور میں |
| کہاں راہِ دلبر، کہاں مے کدہ |
| تری یاد اک جام تھی اور میں |
| اسی کی تھی مسحور کرتی صدا |
| محبّت کا پیغام تھی اور میں |
| نہ آغوشِ وعدہ، نہ زلفوں کے بل |
| تھپکتی ہوا ، عام تھی اور میں |
| نہ قابو میں آئی جو آوارگی |
| وہ صیّاد کا دام تھی اور میں |
| مرے شوق کی خاک روشن ہوئی |
| کہ مٹی مری خام تھی اور میں |
| عبادت نہ کی کعبہ و دیر میں |
| طبیعت وہاں رام تھی اور میں |
| نہ دنیا ملی، اور نہ دیں کا ثواب |
| اطاعت جو ناکام تھی اور میں |
| تُو ساقی، تُو مے، تُو سرود و سُبُو |
| مری زیست بدنام تھی اور میں |
| فقیروں کی طارقؔ سُنی داستاں |
| وہی اُن کا اکرام تھی اور میں |
معلومات