| اک ہجومِ بے کراں کے درمیاں ہے زندگی |
| اللہ کی رحمت سے پھر بھی مہرباں ہے زندگی |
| خار ہیں گرچہ بہت پھولوں کی ہر اک شاخ پر |
| کم سہی پھولوں کے دم سے گلستاں ہے زندگی |
| شُکر ہے لازم بہت ہر سانس میں اللہ کا |
| عالمِ ناسوت میں ہر دم رواں ہے زندگی |
| راستہ چننا سدا تم زندگی میں خیر کا |
| آسرا اس کا نہ ہو تو بے اماں ہے زندگی |
| ہے تغیر کے سبب برکت جہاں میں ہر طرف |
| بالیقیں عالم میں اس سے جاوداں ہے زندگی |
| ان گنت نعمت ہو تم ہی سب گھرانے کے لیے |
| اک تمہارے دم سے ہی تاب و تواں ہے زندگی |
| دل کی تسکیں کا سبب بھی بس تمہاری دید ہے |
| تم ہو سب کی زندگی اور جانِ جاں ہے زندگی |
| ہے دعا میری یہی اسرار بھی تم پر کھُلیں |
| گر کھُلیں تو سود ہے ورنہ زیاں ہے زندگی |
| نورِ چشم و نورِ دل دل کی دعاؤں کے طفیل |
| اللہ کی رحمت سے تیری ضوفشاں ہے زندگی |
معلومات