| نغمات حسیں اُن کے جنہیں عشق سکھاتا ہے |
| انداز و قرینہ پھر انہیں فیض میں آتا ہے |
| اوصاف وہ دلبر کے جب آتے ہیں سمرن میں |
| دل خوشیاں مقدر کی سرِ عام مناتا ہے |
| جو ملتے ہیں طیبہ سے تاباں ہیں وہی رستے |
| طالب کو حسیں ہادی ہر شر سے بچاتا ہے |
| درِ سلطاں پہ آ جاؤ منہ موڑ کے غیروں سے |
| رستہ ہے جو جنت کا اس شہر سے جاتا ہے |
| مے خانے میں ساقی کے سجے جام ہیں وحدت کے |
| سالک کو سخی آقا بھرے جام پلاتا ہے |
| لگتے ہیں گدا اُن کے سلطان جہاں والے |
| وحشی کو کرم اُن کا انسان بناتا ہے |
| جبریل امیں جیسے دربان ہیں آقا کے |
| جو باغ میں سرور کے پھولوں کو سجاتا ہے |
| آتے ہیں عطا والے سرکار کے کوچے میں |
| پہنچے جو حضوری میں مختار بلاتا ہے |
| مجھے طور سے ہیں بڑھ کر در و بامِ سخی سرور |
| جلوہ ہے جو وادی میں کچھ یاد دلاتا ہے |
| مفقود شریعت ہے محمود جو پہلے تھی |
| رستہ جو فروزاں ہے وہ بطحا سے آتا ہے |
معلومات