ہم کو دنیا کا مال لے ڈوبا |
عیش و عشرت کا جال لے ڈوبا |
وقت سے پہلے ہو گئے بوڑھے |
شاعری کا وبال لے ڈوبا |
مرنا آسان تھا ہمارے لیے |
جینے کا احتمال لے ڈوبا |
دیکھ حیرت ہماری آنکھوں کی |
تیرا جاہ و جلال لے ڈوبا |
بھول جاتے تو کتنا اچھا تھا |
ہم کو ذکرِ وصال لے ڈوبا |
حسن دونیم ہو گیا اس کو |
آئنے کا یہ بال لے ڈوبا |
ہائے صاحب جواب کیا دیتے |
اُن کا تیکھا سوال لے ڈوبا |
دیکھ کر جام رند کہتے ہیں |
ہائے یہ رنگ لال لے ڈوبا |
کچھ کو مارا عروج نے شائم |
کچھ کو ان کا زوال لے ڈوبا |
معلومات