| ہوں ناتواں مجھے جینے کا بوجھ کیا کم ہے |
| ہوا و حرص میں ڈوبی فضا بتا کم ہے |
| کسی کو دیکھ کے اٹھتی نہ تھی نگاہ کبھی |
| حیا زمانے کی آنکھوں میں اب ذرا کم ہے |
| تھا احترام بزرگوں کا شاملِ آداب |
| ادب کے بارے میں لوگوں کو اب پتا کم ہے |
| ہوں روشنی سے چکا چوند رات بھر نظریں |
| کہ شب گزاری کو جلتا ہوا دیا کم ہے |
| ہے جانے کتنے حسینوں سے عشق کا دعویٰ |
| کہ دل لگی کے لئے ایک دلرُبا کم ہے |
| ہر ایک پوچھتا ہے مجھ سے کیسا لگتا ہوں |
| کہ اپنے عیب دکھانے کو آئنہ کم ہے |
| کبھی تو خامُشی کی بھی صدا سنائی دے |
| دلیل جب نہ ہو تو شعلۂ نوا کم ہے |
| مریض کب ہوا اچھا فقط دواؤں سے |
| شفا نہ پا سکا کوئی تو کچھ دعا کم ہے |
| عجیب بات بتاتے ہیں علم والے اب |
| کہ سانس لینے کو دنیا میں اب ہوا کم ہے |
| مجھے یقین ہے طارق وہ کہہ نہیں سکتا |
| مری بہشت میں تیرے لئے جگہ کم ہے |
معلومات