.jpg)
| ہم پہ ہر راز آشکار کرو |
| ہم ہیں ہمراز آشکار کرو |
| میرے اندر چُھپا ہُوا ہے جو |
| راز کا راز آشکار کرو |
| وہ جو مُجھ میں ہی گُنگناتا ہے |
| اُس کا ہر ساز آشکار کرو |
| رُوح مُجھ میں وہ کیسے پھونکی تھی |
| وہ ہی انداز آشکار کرو |
| میرے کانوں میں پھر اَلَستْ کہو |
| مُجھ پہ آغاز آشکار کرو |
| کہہ کے عَبْدِیْ مُجھے بُلاتے ہو |
| اپنی آواز آشکار کرو |
| طُور کو آگ جو لگاتا ہے |
| حُسنِ پُر ناز آشکار کرو |
| قَابَ قَوسَیْن جن کی منزل ہے |
| اُن کا اعجاز آشکار کرو |
| جس نے ہر رُوپ تیرا دیکھا ہے |
| وہ نظر باز آشکار کرو |
| راز تیرے جو آشکار کریں |
| ایسے جاں باز آشکار کرو |
| تیرا نائب میں بن کے آیا ہوں |
| میرا اعزاز آشکار کرو |
| لا مکاں پار کر لیا جس نے |
| وہ ہوں شہباز آشکار کرو |
| نغمۂ سوز میں سناؤں کاسے |
| میرا ہم ساز آشکار کرو |
| اپنی قُربت سے اس غلاؔم کو تم |
| کر کے مُمتاز آشکار کرو |
معلومات