بِن عمل ، جو پڑھائی کرتا ہے |
کیا یونہی سر کھپائی کرتا ہے؟ |
وہ شہنشاہوں سے بھی ہے افضل |
اس کی جو بھی گدائی کرتا ہے |
چاندنی تو بلائیں لیتی ہے |
چاند کب بیوفائی کرتا ہے |
جیسا بوتا ہے بیج ، ویسی ہی |
فصل کی بھی کٹائی کرتا ہے |
حسنِ ظن جب نہ ہو تعلّق میں |
پھر تو یہ جگ ہنسائی کرتا ہے |
تیشہ چلتا ہے کوہکن کا جب |
حسن تب آشنائی کرتا ہے |
دیکھنا عشق کی کہانی میں |
کون کب لب کشائی کرتا ہے |
منحصر ہے نتیجہ تو اس پر |
کون دل کی صفائی کرتا ہے |
چاک دامن لئے پھرا اب تک |
وہ عبث اب سلائی کرتا ہے |
وقت بتلائے گا ، کہیں ہم کیا |
کون کس سے لڑائی کرتا ہے |
کیا کہیں شعر ، اور ہم طارق |
کہتے ہیں ، خود نُمائی کرتا ہے |
معلومات