| عرشیوں نے کہا مصطفےٰ آ گئے |
| فرشیوں کے لیے پیشوا آ گئے |
| شاد ہے زندگی مٹ گئے رنج و غم |
| جب سنا میرے خیر الوریٰ آ گئے |
| چاند کی چاندنی بوسہ زن ہو گئی |
| جو زمیں پر وہ صلِ علی آ گئے |
| ذکر ہونے لگا ہر طرف جھوم کر |
| بینواؤں کے دیکھو نوا آ گئے |
| ہر طرف روشنی روشنی چھا گئی |
| شۂ کونین شمس الضحیٰ آ گئے |
| ختم جن پر نبوت ہوئی محترم |
| سب رسولوں کے وہ مُقتَضا آ گئے |
| منہ کے بل گر پڑے بتکدوں میں صنم |
| جیسے ہی وہ حبیبِ خدا آ گئے |
| نارِ دوزخ کو ٹھنڈا کرایا گیا |
| جب نبی محترم مُجتَبیٰ آ گئے |
| تیرے خامہ کی ارشد مٹی تشنگی |
| جب تخیل میں ہیں مُصْطفیٰ آ گئے |
| مرزاخان ارشدؔ شمس آبادی |
معلومات