| کل گیا کوئی ، کوئی آج چلے جانا ہے |
| زندگی تیرا فقط اتنا سا افسانہ ہے |
| کوئی احسان تمہارا نہیں لوٹا پایا |
| اس کے بدلے میں نہیں علم کہ کیا پانا ہے |
| سب گلے شکوے یہیں پر ہیں دھرے رہ جانے |
| اور پھر لوٹ کے کب کس نے یہاں آنا ہے |
| لوگ بدلیں گے ، زمانے کو بدلنا ہو گا |
| منقلب دور زمانے نے یہاں لانا ہے |
| حادثے تم پہ جو گزرے ہیں انہیں بھول گئے |
| تم تو کہتے ہو زمانے کا بھی غم کھانا ہے |
| بات کچھ روز کی ہے اور بھی ہنس لو ہم پر |
| ہم سے کیا کیا نہ ہوا تم نے ہی چلّانا ہے |
| جانتے ہیں کہ ہمیں ہوں گے نشانہ تیرا |
| زندگی اور بھی کیا کوئی ستم ڈھانا ہے |
| کہکشاؤں سے پرے دیکھی تھی منزل اپنی |
| جب ملے خاک سے پھر خاک کو پہچانا ہے |
| طارق آغازِ محبّت میں بتایا تھا گیا |
| تم نے جاں دینے کو آسان بہت جانا ہے |
معلومات