.jpg)
| جَہاں کی سَعادت مِرے مصطفٰی ہیں |
| خُدا کی قَرابت مِرے مصطفٰی ہیں |
| جو نُورِ احد کا ہیں اوّل کرشمہ |
| وہ نُورِ محبت مِرے مصطفٰی ہیں |
| عَدم چیز کیا ہے، یہ کیا ہیں حوادث |
| دَوامِ ہُویّت مِرے مصطفٰی ہیں |
| رسالت، ولایت، امامت ہے جن کی |
| وہ شانِ سیادت مِرے مصطفٰی ہیں |
| ہے جن میں جمال و کمالِ ربانی |
| وہ حُسنِ حقیقت مِرے مصطفٰی ہیں |
| وہ جلوَۂ یَزداں، وہ جلوہ نُما ہیں |
| وَجیہُ الْوَجاہت مِرے مصطفٰی ہیں |
| ملی مومنوں کو فِراست جہاں سے |
| وہ گنجِ فِراست مِرے مصطفٰی ہیں |
| یُصَلُّوْ میں جو رازِ الفت ہے پنہاں |
| وہ حق کی تلاوت مِرے مصطفٰی ہیں |
| تَشہد سَلامی ہے رُوحِ نبیؐ کو |
| ہاں جانِ عبادت مِرے مصطفٰی ہیں |
| غُلام و مَوالی ہیں جن کے سوالی |
| وہ دَستِ عنایت مِرے مصطفٰی ہیں |
| کِسی کو شفاعت کا کیونکر کہوں میں |
| مِری تو شفاعت مِرے مصطفٰی ہیں |
معلومات