| دروازہ اس کا تھوڑا سا وا چاہئے مجھے |
| چوکھٹ پہ رکھ دوں سر وہ جگہ چاہئے مجھے |
| امّید لے کے آ گیا ہوں اس کے در پہ جب |
| ہو جو قبول اب وہ دعا چاہئے مجھے |
| اس کے بغیر جینے کا ہے سوچنا محال |
| اب زندگی نہ اس کے سوا چاہئے مجھے |
| بیمارِ دل کو آسرا جو چارہ گر کا ہے |
| اب جلد دردِ دل کی دوا چاہئے مجھے |
| وہ چارہ گر بنا ہے کرائے علاج کون |
| کہتا ہے کون اس سے شفا چاہئے مجھے |
| عادت سی پڑ گئی ہے سُنے وہ مری سدا |
| اپنی طرف بلائے صدا چاہئے مجھے |
| مانا کہ مجھ سے جرم ہوئے ہوں گے بار بار |
| کہتا نہیں ہوں اس کی سزا چاہئے مجھے |
| طارق وہی تو ہے دلِ ویراں کا گلستاں |
| خوشبو ہو جس میں اس کی فضا چاہئے مجھے |
معلومات