| چلو اک کام کرتے ہیں |
| نیا آغاز کرتے ہیں |
| تمہاری یاد کے بوجھل، تھکے لمحوں کی دہلیزوں پہ |
| جو برسوں پڑی ہے گردِ ہجراں کی اداسی سی |
| اُسے خاموش ہاتھوں سے ذرا ہلکا سا کرتے ہیں |
| وہی بوسیدہ وعدے جو زمانوں سے بکھر بیٹھے |
| وہی خاموش آنکھیں جو شکایت تک نہ کہہ پائیں |
| انہیں پھر روشنی دے کر ذرا آباد کرتے ہیں |
| چلو اک کام کرتے ہیں |
| نیا آغاز کرتے ہیں |
| تمہیں وہ شام یاد آئے کہ شہرِ خامشی میں جب |
| اندھیروں سے سبھی بازار سنساں سے رہتے تھے |
| جہاں ہم نے مقدر کو فقط الزام سمجھا تھا |
| وہیں سے وقت کی ٹوٹی ہوئی زنجیر جوڑیں گے |
| وہیں دل کی شکستہ اینٹ سے اک گھر بنائیں گے |
| چلو پھر زندگی کے سب ادھورے خواب چنتے ہیں |
| جو بکھرے تھے کسی لمحے کی بے آواز آندھی میں |
| انہیں پلکوں پہ رکھ کر ہم نیا اک خواب بنتے ہیں |
| چلو اک کام کرتے ہیں |
| نیا آغاز کرتے ہیں |
| مگر اس بار یہ ہوگا |
| نہ میں الزام دوں گا وقت کی بے رحم گردش کو |
| نہ تم تقدیر کے کاغذ پہ آنسو چھوڑ جاؤ گے |
| اگر رستے میں ہجراں کی کوئی دیوار آ بھی جائے |
| تو ہم دونوں محبت کی صدا سے توڑ دیں گے وہ |
| مگر آغاز ایسا ہو |
| کہ جیسے خشک صحرا میں اچانک چشمہ پھوٹے ہو |
| کہ جیسے رات کی چھاتی پہ کوئی صبح لکھ دے |
| کہ جیسے ٹوٹتے دل کو دعا کی روشنی ملتی |
| ہم اپنے زخم گن لیں گے |
| وہ زخم جو محبت کی امانت تھے مگر ہم نے |
| انہیں قسمت کی سازش کہہ کے تنہا چھوڑ رکھا تھا |
| تم اپنے دکھ سنانا |
| میں اپنے غم سناؤں گا |
| اور ان سب تلخ لمحوں کو |
| محبت کے سمندر میں ڈبو کر بھول جائیں گے |
| مگر اک خوف دل میں ہے… |
| کہیں ایسا نہ ہو پھر سے |
| زمانہ اپنے خنجر لے کے دروازے پہ آ بیٹھے |
| کہیں ایسا نہ ہو پھر سے |
| ہماری آنکھ میں اگتی ہوئی امید مر جائے |
| مگر پھر بھی |
| چلو اک کام کرتے ہیں |
| نیا آغاز کرتے ہیں |
| اگر اس بار بھی قسمت ہمیں رستہ نہ دے پائے |
| تو ہم دونوں |
| محبت کی قسم کھا کر |
| زمانے کی کتابوں سے الگ اک باب لکھ دیں گے |
| جہاں بس تم ہو، میں ہوں |
| اور ہمارے بیچ |
| وہ سچ ہو |
| جو دنیا کی کسی تہذیب نے اب تک نہیں لکھا |
| اگر پھر بھی |
| یہ دنیا جیت جائے پھر |
| تو آؤ وعدہ کرتے ہیں |
| کہ ہم اپنی شکستہ آرزوؤں کی لحد پر |
| ایک جملہ لکھ کے مر جائیں |
| "یہاں دو لوگ رہتے تھے |
| جو اک آغاز کرنا چاہتے تھے پر |
| زمانہ ان کو اک آغاز کرنے دے نہیں پایا …" |
معلومات