| وہ ایک شخص ہزاروں کمال رکھتا ہے |
| وہ ماہِ کنعاں سا حسن و جمال رکھتا ہے |
| ہے اس کو چاہتا دنیا میں ایک جمِّ غفیر |
| ہر ایک اس سے امیدِ وصال رکھتا ہے |
| وہ آ کے بیٹھتا ہے سامنے کہ پوچھ سکے |
| کوئی جو ذہن میں اپنے سوال رکھتا ہے |
| ہے غم زدوں کو وہ تقسیم کر رہا خوشیاں |
| وہ دوسروں کے بھی غم خود سنبھال رکھتا ہے |
| خوشی میں اپنے غلاموں کی بھی وہ ہو شامل |
| تبسّم اس کا دلوں کو نہال رکھتا ہے |
| وہ بادشہ ہے خلافت کے تخت پر بیٹھا |
| خدا کا عشق بھی وہ بے مثال رکھتا ہے |
| دعاؤں میں جو ہمیشہ رکھے ہمیں شامل |
| ہے اور کون جو ایسا خیال رکھتا ہے |
| وہ حسن جس نے بھی دیکھا قریب سے طارق |
| وہ عشق اس کا ، کہیں دل میں پال رکھتا ہے |
معلومات