| کو بہ کو چاندنی اتر آئی |
| جھیلوں میں زندگی اتر آئی |
| دیکھ کر گوبپاں نہاتی کو |
| کرشن کی بانسری اتر آئی |
| جھانکتے جھانکتے مرے دل میں |
| خوشبوئے سانولی اتر آئی |
| ایک جگنو جو آ کے بیٹھ گیا |
| میرے گھر روشنی اتر آئی |
| دیکھتے آپ کا حسیں چہرہ |
| میر کی شاعری اتر آئی |
| دیکھ کر آپ کے تبسم کو |
| چہرے میں اک ہنسی اتر آئی |
| عالمِ صد غریب دل میں مرے |
| خواہشِ خسروی اتر آئی |
| سینۂ کوہ قاف دل کو کیے |
| اک پری پیکری اتر آئی |
| کاٹ کر لہرِ زندگی کو مری |
| کشتئ کاغذی اتر آئی |
| دائیں بائیں نہ جب سہارا ملا |
| منزلِ کج روی اتر آئی |
| عشق جب حد سے بڑھ گیا تو پھر |
| شوق میں بے گھری اتر آئی |
| یوں تو ہر دیس پھر لیا ساگر |
| سینے میں ممبئی اتر آئی |
معلومات