| ترا درد راہوں میں رکھتا ہے مجھ کو |
| زمانہ نگاہوں میں رکھتا ہے مجھ کو |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| مَیں ہوں خاکساروں میں رہنے کے قابل |
| وہ مالِک ہے شاہوں میں رکھتا ہے مُجھ کو |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| مرے دشمنوں سے بچا کر مُجھے وہ |
| مرے خیر خواہوں میں رکھتا ہے مجھ کو |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| مَیں دشمن کی چالوں میں آتا نہیں ہوں |
| وہ اپنی پناہوں میں رکھتا ہے مجھ کو |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| مرا دل حقیقت میں ہمدم ہے میرا |
| محبت کی بانہوں میں رکھتا ہے مجھ کو |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| کوئی اب بھی روتا ہے مُجھ سے بچھڑ کر |
| کوئی اپنی آہوں میں رکھتا ہے مُجھ کو |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| خدا آپ مانی سکھاتا ہے الفت |
| خدا درسگاہوں میں رکھتا ہے مجھ کو |
معلومات