| مرا شباب ڈھل گیا |
| مرا گلاب جل گیا |
| زمانہ ہی بدل گیا |
| بدل گیا، بدل گیا |
| وہ میرا آشنا تھا جو |
| وہ میرا مبتلا تھا جو |
| فریفتہ تھا حسن پر |
| مرے وجود کا سفر |
| بہت تھکا گیا اسے |
| کوئی بتا گیا اسے |
| میں پہلی سی نہیں رہی |
| جو پہلے تھی نہیں رہی |
| وہ سیم جسم، ماہ رُو |
| وہ صندلیں بدن کی بُو |
| زیاں و سود کچھ نہیں |
| مرا وجود کچھ نہیں |
| یقین کی کمی نہ ہو |
| رفیق اجنبی نہ ہو |
| خدا کرے کبھی نہ ہو |
| کبھی نہ ہو، کبھی نہ ہو |
| مری جبیں کی روشنی |
| اداسیوں میں کھو گئی |
| مری ہنسی، مری پکار |
| مرے وجود کی بہار |
| ادا و ناز، شوخ رنگ |
| لہو لہو ہے انگ انگ |
| میں روؤں رات رات بھر |
| بس ایک بات رات بھر |
| یہ میرے ساتھ کیا ہوا |
| وہ مجھ سے کیوں جدا ہوا |
| مرا قصور تو بتا |
| مرا نصیب، اے خدا! |
| مرا وجود عارضہ |
| کہاں سے لاؤں حوصلہ |
| میں کس سے جا کروں گلہ |
| کروں گلہ، کروں گلہ |
| بکھر گئی ہے زندگی |
| کہیں نہیں رہی خوشی |
| میں موت مانگتی پھروں |
| میں مبتلائے عشق ہوں |
| جدائی ہے مرا نصیب |
| جواب دے چکے طبیب |
| سزائے زندگی مگر |
| نہیں ہے اتنی مختصر |
| کہ چھوٹ جائے جاں مری |
| کہ بند ہو زباں مری |
| میں اپنی قبر کھود لوں |
| میں اپنی موت گود لوں |
| دہکتے صبح و شام میں |
| بھرا ہے زہر جام میں |
| مزہ نہیں کلام میں |
| کلام میں، کلام میں |
| ملال پالتی ہوں میں |
| دھمال ڈالتی ہوں میں |
| میں دسترس میں کب رہی |
| میں اپنے بس میں کب رہی |
| خلافِ آرزو ہوا |
| جگہ جگہ رفو ہوا |
| رہِ جنون میں قدم |
| ملا نہ کچھ سوائے غم |
| سکونِ جان لُٹ گیا |
| مرا جہان لُٹ گیا |
| ہے تنہاؔ ”زخمِ تیرہ روز“ |
| بیانِ داستانِ سوز |
معلومات